O 5 Coruña FS suma un compañeiro de viaxe moi especial nesta tempada: Flores Rock, o festival do Barrio das Flores que xa se converteu nun referente musical e cultural de alcance internacional.
Cada ano, o barrio énchese de música, vida e ilusión para celebrar un festival que vai máis alá do rock: é identidade, comunidade e orgullo veciñal. Valores que encaixan á perfección coa filosofía do noso club.
Flores Rock non é só un evento, é o latexo do Barrio das Flores, un espazo onde xeracións enteiras medraron co mesmo espírito de unidade que hoxe defendemos na pista. A paixón, o esforzo e o compromiso coa nosa cidade son os piares comúns que fan desta unión un paso natural.
Con este patrocinio, música e fútbol sala danse a man para seguir construíndo identidade, raíces e soños compartidos.
Dende o 5 Coruña FS queremos agradecer a Flores Rock a súa confianza e apoio nesta nova etapa. Sen dúbida, xuntos seguiremos facendo barrio, facendo cidade e facendo historia.
